Sardar Gurjari

૨૬-૨-૨૦૧૪, બુધવાર

મુખ્ય સમાચાર :

અંતર્દૃષ્ટિ-દૈવીય શરણ

15/05/2021 00:05 Send-Mail

આપણા જીવનકાળમાં જાણે કેટલાય ઉતાર-ચડાવ આવે છે. કેટલાક સ્વાભાવિક રૂપે પસાર થઈ જાય છે તો કેટલાક બહુ મુશ્કેલીથી. સુખદ પળ તો આનંદથી કપાઈ જાય છે, પરંતુ ખરાબ સમય જ પોતાના-પારકા, સજ્જન-દુર્જનનું ભાન કરાવે છે. હાલની ભયાવહ પરિસ્થિતિમાં બધાનો પરિચય કાળે જાતે જ કરાવી દીધો છે. આ સમય ઈશ્વરની શરણમાં, આધ્યાત્મિક ગ્રંથોના પાઠમાં જ અસીમ શાંતિનો અનુભવ થઈ શકે છે. રામચરિત માનસના આરંભમાં ગોસ્વામી તુલસીદાસે સજ્જન-સંત અને દુર્જનની તમામ ઉપમાઓથી સુસજ્જિત વ્યાખ્યા કરી છે. તેમણે સંત અને કપાસમાં સમાનતા સમજાવી છે. કપાસનું ફળ નીરસ અને વિષદ, પરંતુ ગુણમય હોય છે. એ જ રીતે સંત વિષયાસક્તિ રહિત કપાસ સમાન ઉજ્જવળ અને ગુણમય હોય છે. કપાસ લણવા, કાંતવા, વણવા અને સોય દ્વારા છેદાવાના દર્દને પણ સહીને વસ્ત્ર રૂપે પરિવર્તિત થઈને બીજાઓનું તન ઢાંકે છે. એ જ રીતે સંતનું જીવન પણ કઠિનાઇઓ, દર્દ અને વિષમતાઓ સહન કરીને બીજાના દોષો અને કષ્ટોને હરવાના પ્રયાસમાં રહે છે તથા વંદનના પાત્ર બને છે. તુલસીદાસે દુર્જનો અને દુષ્ટોની તુલના આકાશમાંથી પડતા કરા સાથે કરી છે, જે પાકને નષ્ટ કરીને પોતે પણ ઓગળી જાય છે.
સ્પષ્ટ છેકે રામચરિતમાનસ અને ગીતાના વિચારોને હૃદયમાં સ્થાન આપીને આપણે આજના આ ભયાવહ, વિકરાળ અને આતંકિત માહોલનો સારી રીતે સામનો કરી શકીએ છીએ. સંત અને દુર્જનમાં અંતર કરી શકવું આપણી અનેકાનેક સમસ્યાઓનો હલ હોઇ શકે છે. આજે પણ ઘણા લોકો ગીતા અને રામચરિતમાનસનો પાઠ સર્વોચ્ચ ભક્તિથી કરીને લૌકિકતાનો અનુભવ કરી શકે છે. એવી કઠિન પરિસ્થિતિઓમાં આપણે બધા ભારતવાસીઓને તેનું રસાસ્વાદન અવશ્ય કરવું જોઇએ. પારિવારિક સંબંધો સિવાય સર્વોત્તમ જ્ઞાન, ભક્તિ, ત્યાગ, વૈરાગ્ય વગેરેનું શિક્ષણ ભગવાન શ્રીરામની આદર્શ માનવલીલાથી સહજ હાંસલ કરી શકાય છે. કદાચ એટલે જ કહેવાય છે કે રામજી જ નૈયા પાર લગાવશે.