Sardar Gurjari

શુક્રવાર, તા. ૯ ડિસેમ્બર, ૨૦૨૨, માગશર વદ ૧, વિ.સં. ૨૦૭૯, વર્ષ -૨૨, અંક -૧૭૨

મુખ્ય સમાચાર :
બોરસદ પાલિકાના જેસીબીનો ખાનગી ખેતરમાં સફાઇ માટે ઉપયોગ સામે કાઉન્સિલરોનો હોબાળો
ચીફ ઓફિસરે જેસીબી લઇને મોકલ્યાની પાલિકાના ડ્રાયવરની કબૂલાત
02/10/2022 00:10 AM Send-Mail
બોરસદ નગરપાલિકાનું જેસીબી મશીન વહેરા ગામની હદમાં ખાનગી ખેતરમાં સાફસફાઇ માટે મોકલાયું હતું. જેનો જાગૃત વ્યકિતએ વિડીયો ઉતારીને કાઉન્સિલરોને મોકલ્યો હતો. જેથી કાઉન્સિલરોએ ચીફ ઓફિસર પાસે જઇને સમગ્ર મામલે હોબાળો મચાવ્યો હતો. જો કે ચીફ ઓફિસરે પોતે જેસીબી ન મોકલ્યાનું જણાવ્યું હતું પરંતુ જેસીબીના ડ્રાઇવરે ચીફ ઓફિસરે મોકલ્યા હોવાની કબૂલાત કરી હતી. આથી કાઉન્સિલરોએ કાયદેસરની કાર્યવાહીની માંગ કરી હતી. જો કે વધુ હોબાળો થતા ચીફ ઓફિસર ચેમ્બર છોડીને ગાડીમાં રવાના થઇ ગયા હતા.

બોરસદ શહેરની નજીક આવેલ વહેરા ગામની હદમાં આવેલા ખેતરમાં અવરજવરના રસ્તા પર ઉગી નીકળેલા ઝાડીઝાંખરાને હટાવવા, વાડને સરખી કરવા ચીફ ઓફિસર યોગેશ ગણાત્રા દ્વારા પાલિકાના કર્મચારી રવિભાઇને જેસીબી મશીન લઇને જવા કહયું હતું. જો કે તે પાલિકા હદની બહારની, ખાનગી જગ્યા હોવાનું જણાવવા છતાંયે ચીફ ઓફિસરે જેસીબી,કર્મચારી મોકલીને કામગીરી શરુ કરાવ્યાનું રવિભાઇએ જણાવ્યું હતું. દરમ્યાન જાગૃત નાગરિકે સમગ્ર ઘટનાનો મોકલેલ વિડીયો જોઇને કાઉન્સિલર રીતેશભાઇ પટેલ, હેમુખાન પઠાણ, દીપકભાઇ પટેલ, મહંમદભાઇ વગેરે ચીફ ઓફિસર પાસે પહોંચીને જેસીબીનો વિડીયો બતાવ્યો હતો. ઉપરાંત કાઉન્સિલરે જેસીબી મોકલવા માટે જવાબદાર તમામ પાસેથી ભાડાની રકમ વસૂલ કરવા સહિત કાયદેસર કાર્યવાહીની માંગ કરી હતી. જો કે ચીફ ઓફિસર કચેરી છોડી જતા કાઉન્સિલરોએ આ મામલે કલેકટર અને પ્રાદેશિક કમિશ્નરમાં ચીફ ઓફિસર સામે પગલાં ભરવાની લેખિત રજૂઆત કરવામાં આવનાર હોવાનું જણાવ્યું હતું.