સુરત : અસલી ચલણી નોટો વચ્ચે ચિલ્ડ્રન બેંકની નોટો મૂકી લોકોને પધરાવવાનો ખેલ
૪,૮૫,૩૫,૦૦૦ રોકડ સહિત ૫૦ સોનાની અને ૧૦ ચાંદીની લગડીઓ સાથે ૬ ઝડપાયા
સુરત SOG અને ATSનું સંયુક્ત ઓપરેશનમા ૪ કરોડ રૃપિયાની ચિલ્ડ્રન બેન્ક ની નોટ ઝડપાઇ છે. અસલી નોટોમાં લોકોને છેતરી ચિલ્ડ્રન બેન્કની નોટ પધરાવતા સુરતના અમરોલી મોટા વરાછા વિસ્તાર ૯૯ શોપિંગ કોમ્પલેક્ષમાંથી ચિલ્ડ્રન બેન્કની નોટ આપીને છેતરપિંડી કરનારી ગેંગને ઝડપી પાડવામાં આવી છે. પોલીસ તપાસમાં જે બાતમી મળી હતી તેના આધારે શોપિંગ કોમ્પ્લેક્સના ત્રીજા માળે રેડ કરતા ૬ લોકોને ઝડપી પાડવામાં આવ્યા હતા.
સુરતના અમરોલી વિસ્તારમાં ૯૯ શોપિંગ કોમ્પલેક્ષમાં અસલી નોટોમાં થોડી ઓરીજનલ નોટ મૂકી નીચે ચિલ્ડ્રન બેન્કની નોટ પધરાવતા હતા. તેઓ લોકોનો સંપર્ક કરીને જે તે જગ્યા ઉપર મળવાનું કહી વાતચીત કરતા અને ત્યારબાદ પોલીસ આવી જશે તેઓ ડર બતાવીને ઝડપથી નોટના બંડલ ભરેલી બેગની આપલે કરીને નાસી જતા હતા. આ બાબતની જાણ એસઓજી અને એટીએસની ટીમને થતા સંયુક્ત રીતે ઓપરેશન હાથ ધરીને છ લોકોને મુદ્દામાલ સાથે ઝડપી પાડયા હતા.
એસઓજી અને એટીએસના સંયુક્ત ઓપરેશનમાં છ ઈસમોને ઝડપી પાડી તેમની પાસેથી મુદ્દા માલ ઝડપી લીધો હતો જેમાં ૪,૮૫,૩૫,૦૦૦ની રૃપિયા ૨૦૦૦ અને ૫૦૦ના દરની નોટો ઝડપી પાડવામાં આવી હતી. તેમજ આરોપીઓ પાસેથી ૫૦ ગોલ્ડ અને ૧૦ સિલ્વરની લગડીઓ પણ મળી આવી હતી.
પોલીસે શખ્સોને ઝડપી પાડીને કાયદેસરની કાર્યવાહી શરૃ કરી છે.
સ્પેશિયલ ઓપરેશન ગ્રુપના ડીસીપી રાજદીપસિંહ નકુમે જણાવ્યું કે આ શખ્સો જે નોટના બંડલ આપતા હતા તેમાં ઉપર અને નીચે ઓરીજનલ નોટ મૂકી દેતા અને વચ્ચેના ભાગે ડુપ્લીકેટ ૨૦૦૦ અને ૫૦૦ની દરની નોટો મૂકતા હતા. આ નોટો પધરાવી દેવા માટે તેમણે અલગ-અલગ પાર્ટીઓ સાથે વાતચીત શરૃ કરી હતી પરંતુ પ્રાથમિક પૂછપરછ મુજબ હજુ સુધી કોઈ મોટી ડીલ તેમના દ્વારા કરવામાં આવી ન હોવાનું આરોપી જણાવી રહ્યા છે.
હાલ ઝડપાયેલા આરોપીઓની સામે કાયદેસરની કાર્યવાહી શરૃ કરવામાં આવી છે તેમજ આ નોટ કયાંથી લાવતા હતા અને કોની કોની સાથે તેમને ડીલ થઈ છે તેની તપાસ કરવાની જરુર છે.