બજેટમાં સોના-ચાંદી પર કસ્ટમ ડ્યુટી વધારવા જાહેરાત
સોનાના ભાવ રૂ.૫૮,૫૨૫ ઐતિહાસિક સપાટીએ, ચાંદીના ભાવ પણ આસમાને પહોંચ્યા
સોનાના ભાવમાં ગત ૪ માસમાં ૯૦૦૦ રૂપિયા પ્રતિ ૧૦ ગ્રામનો ઉછાળો નોંધાયો: ચાંદી ૭૧૨૮૦ ઉપર
બજેટમાં સોના-ચાંદી પર કસ્ટમ ડયૂટી વધારવાની જાહેરાત કરાયા બાદ બુધવારે સોનું ૫૭૯૧૦ના ઓલ ટાઈમ હાઈના સ્તરે પહોંચી ગયું હતું અને આજે એમસીએક્સ પર ૧.૧૧ ટકા ચઢીને ૫૮૫૨૫ રૃપિયાએ પહોંચી ગયું છે.
ચાંદી પણ ૨.૦૬ ટકાના વધારા સાથે ૭૧૨૮૦ રૃપિયાના ભાવે પહોંચી ગઈ હતી. એમસીએક્સ પર સોના-ચાંદીનો આ ભાવ ક્રમશઃ ૫ એપ્રિલ અને ૩ માર્ચનો વાયદો છે. આંતરરાષ્ટ્રીય બજારમાં તેજી અને ઘરેલુ માગને લીધે સોનાના ભાવમાં ગત ૪ મહિનામાં ૯૦૦૦ રૃપિયા પ્રતિ ૧૦ ગ્રામનો ઉછાળો નોંધાયો છે. જોકે નવા વર્ષના પહેલા જ મહિનામાં સોનાના ભાવમાં ૪૦૦૦ રૃપિયાનો ઉછાળો નોંધાયો છે.
ઉલ્લેખનીય છે કે બજેટ આવ્યા બાદ નિષ્ણાતોનું માનવું છે કે હવે સોનાનો ભાવ ૬૫૦૦૦ રૃપિયા પ્રતિ ૧૦ ગ્રામ સુધી પહોંચવાની શકયતાઓ વધી ગઈ છે. જ્યારે ચાંદીમાં પણ ઉછાળો જોવા મળશે. બજેટ ભાષણમાં પણ નાણામંત્રી નિર્મલા સીતારમણે કસ્ટમ ડયૂટી વધારવાની જાહેરાત કરી હતી.
કેડિયા કોમોડિટીઝના પ્રેસીડેન્ટ અજય કેડિયા કહે છે કે સોના-ચાંદીની ઈમ્પોર્ટ ડયૂટીમાં ઘટાડાની આશા હતી પણ તેનાથી વિપરિત કસ્ટમ ડયૂટીમાં વધારો કરી દેવાયો. તેમણે કહ્યું કે રશિયા-યુક્રેન યુદ્ધ, બજારમાં મંદીની આશંકા, ઈટીએફમાં રોકાણમાં વધારો અને કેન્દ્રીય બેક્નો દ્વારા સતત સોનાની ખરીદીને કારણે જ સોનાના ભાવમાં તેજીનો માહોલ જોવા મળી રહ્યો છે. ચાંદીની વાત કરીએ તો તે ૯૦ હજારના ભાવને સ્પર્શી શકે છે.