કિંખલોડ સીમમાં બોર ખાવા ગયેલા કિશોરનું વીજકરંટ લાગતા કમકમાટીભર્યુ મોત
કેળાના ખેતરની ફરતે મારેલી લોખંડની તારવાળી વાડને અડી જતાં અનિલભાઈ ઠાકોરનું મોત નિપજ્યું
માનપુરામાં વીજ કરંટ લાગતા નીલગાયનું મોત ખેતર માલિક પાસેથી ૨૫ હજાર દંડ વસૂલાયો
આંકલાવ તાલુકાના માનપુર ગામે રહેતા સુરેશભાઈ કાળાભાઈ પઢિયારે સીમ વિસ્તારમાં આવેલા પોતાના ખેતરમાં પાકને પશુઓથી બચાવવા માટે ખેતરની ચારે તરફ લાકડાના પોલ ઉભા કરીને તેના પર લોખંડના તાર બાંધી દીધા હતા. ત્યારબાદ તેના પર વીજ કરંટ પસાર કર્યો હતો. દરમ્યાન એક નીલગાય ત્યાં આવી ચઢતાં વીજ કરંટ લાગવાથી તેનું સ્થળ પર જ મોત થયું હતુ. આ અંગે ફોરેસ્ટ વિભાગ દ્વારા ગુનો દાખલ કરીને આરોપી સુરેશભાઈ પઢિયારને ઝડપી પાડીને તેની પાસેથી દંડ પેટે કુલ ૨૫ હજાર રૂપિયા વસુલ કર્યા હતા.
આંકલાવ તાલુકાના કિંખલોડ ગામની રવિપુરા સીમમાં ગઈકાલે સાંજના સુમારે બોર ખાવા માટે ગયેલા એક કિશોરને વીજકરંટ લાગતાં તેનું ઘટનાસ્થળે જ કમકમાટીભર્યું મોત નિપજ્યું હતું.
કિંખલોડ ગામે રહેતો અનિલ પ્રવિણભાઈ ઠાકોર નામનો ૧૧ વર્ષીય કિશોર ગઈકાલે સાંજના પાંચેક વાગ્યાના સુમારે સ્કૂલેથી છૂટીને ઘરે આવ્યો હતો ત્યારબાદ રવિપુરા સીમમાં બોર ખાવા માટે ગયો હતો. દરમ્યાન રમેશભાઈ કાનજીભાઈ પટેલના કેળાના પાકવાળા ખેતરની ફરતે મારેલી લોખંડની તારવાળી વાડને અડી જતાં તેને જોરદાર વીજકરંટ લાગતાં સ્થળ પર જ મોત નિપજ્યું હતું.
ઘટનાની જાણ પરિવારજનોને થતાં તેઓ સ્થળ પર આવી પહોંચ્યા હતા અને તુરંત જ ભાદરણ પોલીસને જાણ કરતા પોલીસ પણ આવી પહોંચી હતી અને લાશનો કબ્જો લઈને પીએમ માટે સરકારી હોસ્પિટલમાં મોકલી આપી હતી.
સૂત્રોના જણાવ્યા અનુસાર રમેશભાઈ પટેલે કેળાના પાકને પશુઓથી બચાવવા માટે ખેતરની ફરતે લોખંડના તારવાળી વાડ બનાવી હતી અને તેમાં ઝટકા કરંટ ઉતાર્યો હતો. જો કે ઝટકા કરંટ લાગવાથી કોઈનું મૃત્યુ ના નીપજી શકે, ડાયરેક્ટ વીજકરંટ ઉતારવામાં આવ્યો હોય તો જ મોત થાય. આ અંગે હાલમાં તો પોલીસે અકસ્માતે મોતનો ગુનો દાખલ કરીને તપાસ હાથ ધરી છે. પીએસઆઈ એસ. એમ. પટેલના જણાવ્યા અનુસાર હજી સુધી પીએમ રીપોર્ટ, એફએસએલ અને જીઈબીનો રીપોર્ટ આવ્યો નથી. તે આવ્યા બાદ તુરંત જ ગુનો દાખલ કરી દેવામાં આવશે.