સમગ્ર વિવાદ મામલે દાતા ડો.અસિતભાઇએ જણાવ્યું હતું કે, મોગર પાસે જમીન ખરીદ્યા બાદ વિદેશમાંથી જે તે સમયે અંદાજે ૫ લાખ ડોલર (તે સમયના ૨.૫૦ કરોડ) રૂપિયા જેટલું દાન ઉઘરાવીને વ્રજભુમિ ફાઉન્ડેશનમાં મોકલી આપ્યું હતુ. જે અંગેના તમામ પુરાવાઓ અમારી પાસે ઉપલબ્ધ છે.આ દાન થકી જ સમગ્ર સ્કૂલ અને હોસ્ટેલનું ઈન્ફ્રાસ્ટ્રક્ચર ઉભુ કરવામાં આવ્યું હતુ. ત્યારબાદ ધો.૧ થી ૧૦ની અંગ્રેજી માધ્યમની સ્કૂલ શરૂ કરવામાં આવી હતી. પરંતુ ત્યારબાદ સ્વામી નારાયણચરણદાસજીએ સમગ્ર ટ્રસ્ટ ઉપર કબ્જો જમાવી દઈને એકહથ્થુ શાસન ઉભું કર્યુ હતું. કોર્પોરેટ કક્ષાનો વહિવટ કરી રાજકોટ અને ગોંડલમાં પણ વ્રજભુમિના નામે સ્કુલો ઉભી કર્યા બાદ ગોંડલ સ્થિત સ્કૂલને કરોડો રૂપિયામાં વેચી પણ દીધી હતી. આમ, સેવાનો ઉદ્દેશ્ય બાજુ પર રહી જવા પામ્યો હતો શિક્ષણનું વેપારીકરણ થઈ જવા પામ્યું હોવાનું જણાવતા ડો.અસિતભાઇએ કહ્યું હતું કે, પેટકોનના અરવિંદભાઈ પટેલની ટ્રસ્ટી તરીકે કરાયેલી નિમણુંક પણ ગેરકાયદેર છે અને તેની અમને જાણ થયા બાદ વાંધા અરજીઓ આપતા ૨૦૧૨ થી ૨૦૨૨ સુધી આ કેસ ચેરીટી કમિશ્નરમાં ચાલ્યો હતો. આખરે અરવિંદભાઈનું નામ પીટીઆર પર ટ્રસ્ટી તરીકે આવી જવા પામ્યું છે. ખરેખર અમે અરવિંદભાઈની ટ્રસ્ટી તરીકે નિમણૂંક કરી જ નથી, ઠરાવમાં ગેરકાયદેસર રીતે તેમનું નામ જોડીને ટ્રસ્ટી તરીકે નિમણૂંક આપવામાં આવી છે.

વ્રજભુમિ ફાઉન્ડેશનના ઉપપ્રમુખ ટ્રસ્ટી અને હાલમાં તમામ કાર્યભાર સંભાળતા સ્વામી નારાયણચરણદાસજીએ સમગ્ર વિવાદ અંગે જણાવ્યું હતુ કે, જો દાતા દંપતિએ કરોડો રૂપિયાનું દાન આપ્યું છે તો તેના પુરાવા રજુ કરે, દાન આપ્યાની માત્ર વાતો જ છે. ટ્રસ્ટીઓ અંગે જે વિવાદ ચાલી રહ્યો છે તેમાં કોઈ સત્યતા નથી. વધુમાં કહયું હતું કે, અરવિંદભાઈ પટેલની ટ્રસ્ટી તરીકે નિમણુંક કરતો ઠરાવ થયો હતો,ત્યારબાદ જ તેમની નિમણુંક થઈ છે અને ચેરીટી કમિશ્નેરે પણ પીટીઆર ઉપર નામ દાખલ કર્યુ છે એટલે તેમની નિમણુંક ગેરકાયદેસર ન ગણી શકાય. વળી એક વર્ષ બાદ સમગ્ર ઘટનાની પાવર ઓફ એટર્ની દ્વારા ફરિયાદ આપવામાં આવી છે. જ્યારે બનાવ બન્યો ત્યારે શું પાવર ઓફ એટર્ની હોલ્ડર જગ્યા ઉપર હાજર હતા ? આથી શું ઘટના બની તે કેવી રીતે કહી શકે ? એટલે સમગ્ર ફરિયાદ પણ ખોટી રીતે દાખલ કરવામાં આવી હોવાનું વધુમાં તેમણે જણાવ્યું હતુ.

ગરીબ અને મધ્યમવર્ગીય બાળકોને સારું શિક્ષણ આપવાના મૂળ હેતુ સાથે ઉભી કરાયેલ મોગરના વ્રજભુમિ ફાઉન્ડેશન દ્વારા સંચાલિત સ્કૂલમાં ધો.૧ થી ૧૦ સુધી અંંગ્રેજી માધ્યમમાં ભણાવાય છે. જેમાં દર વર્ષે ૧૦થી ૧૨ કરોડ રૂપિયા જેટલી ફી ઉઘરાવવામાં આવતી હોવાનું ચર્ચાઈ રહ્યું છે. આ સ્કૂલમાં ગરીબ કે મધ્યમ વર્ગના પરિવારોને પ્રવેશ જ આપવામાં આવતો નથી. માત્રને માત્ર માલેતુજારોના પુત્ર-પૌત્રીઓને જ તગડી ફી લઈને પ્રવેશ અપાઈ રહ્યો હોવાનો મૂળ ફાઉન્ડર ટ્રસ્ટીઓ-દાતાઓ દ્વારા આક્ષેપ થઇ રહ્યો છે અને જાણવા મળ્યા મુજબ વિવાદનું મૂળ કારણ પણ આ જ છે.

વ્રજભુમિ ફાઉન્ડેશનની રચનાના મુખ્ય દાતા એનઆરઆઈ દંપત્તિ મિનાક્ષીબેન અને તેમના પતિ આસિતભાઈ ઉપર કરાયેલા હુમલા સંદર્ભે એક વર્ષ બાદ પોલીસ ફરિયાદ લઈને ગુનો દાખલ કર્યો છે. પરંતુ હજી વાસ્તવિક ઝડપી કાર્યવાહીના બદલે તપાસના નામે ચલ્લકચલ્લાણું જ ચાલી રહ્યું હોવાનું ચર્ચાઈ રહ્યું છે. વાસદના પીએસઆઈનો આ બાબતે સંપર્ક કરતા સમગ્ર વિવાદ ટ્રસ્ટીઓને લઈને ચાલી રહ્યો છે જે અંગે નિવેદનો લેવાની કાર્યવાહી ચાલી રહી છે. નિવેદનો લીધા બાદ ધરપકડની કાર્યવાહી કરવામાં આવશે તેમ જણાવ્યું હતુ.