આણંદ જિલ્લા ખેતીવાડી અધિકારી ચિંતન પટેલે જણાવ્યું હતું કે, ગત વર્ષ માવઠાંના કારણે સર્વ બાદ નિયમોનુસારની નુકસાની બદલ ખેડૂતોને સહાય ચૂકવણી કરવામાં આવી હતી. જો કે એપ્રિલમાં થયેલ માવઠાંની ખેતી પાકને નુકસાની ન હોવાથી રિપોર્ટ કરવામાં આવ્યો નહતો. વધુમાં જણાવ્યુ ંહતું કે, રવિવારે થયેલ માવઠાંથી નુકસાન થયાની સંભાવના છે. આથી નુકસાનીના સર્વ માટે ટીમો દ્વારા રિપોર્ટ-સર્વની કામગીરી આરંભવામાં આવી છે. ત્યારબાદ પાક નુકસાની અંગે ખેડૂતોની અરજીઓ સ્વીકારવામાં આવશે. આ અરજીઓના એનાલીસીસ થવા સહિતની પ્રકિયા બાદ સરકાર દ્વારા નિયમોનુસાર સહાય ચૂકવણી હાથ ધરશે. જો કે સમગ્ર કામગીરીમાં બે માસ જેટલો સમય થઇ શકે છે.

સરકારી વળતર-સહાયના નિયમો પણ સામાન્ય ખેડૂતને સમજમાં ન આવે તેવા પ્રકારના હોવાની વારંવાર રજૂઆત થાય છે. સરકારી નિયમ મુજબ માવઠું થાય ત્યારે પ૦ મીમી (ર ઇંચ) વરસાદ નોંધાયો હોય તેમજ પાકને ૩૩ ટકાથી વધુ નુકસાન થયું હોય તો સરકારી સહાય મળી શકે છે. ઉપરાંત પાકની સીઝનના આધારે નુકસાનીનું વળતર નકકી થતું હોય છે. આ નિયમના કારણે સર્વમાં ૩ર ટકાથી ઓછી નુકસાનીનો સમાવેશ કરવામાં આવતો નથી. જેના કારણે અનેકો નાના ખેડૂતો પાક નુકસાનના આર્થિક ભારણ હેઠળ દબાવવા સહિત સહાયથી પણ વંચિત રહી જાય છે. આથી સરકાર દ્વારા વાસ્તવિક સર્વ હાથ ધરીને માવઠાંના કારણે આર્થિક ભીંસમાં મૂકાયેલા નાના ખેડૂતોને સહાયરુપી ટેકો આપવામાં આવે તેવું જગતનો તાત ઇચ્છી રહ્યો છે.