ખંભાતમાં રણજીતરાય શાસ્ત્રીએ ભૂખ્યાંને ભોજન મળી રહે તેવી મનોઇચ્છાને મૂર્તિમંત કરવા માટે ૧૯૭૩માં રહેરના બકરાવાળાના ખાચાંમાં અન્નપૂર્ણા સસ્તું ભોજનાલયની સ્થાપના કરી હતી. જેમાં ગાંડાભાઇ ચાવાળા, ચંદુભાઇ કેશવલાલ ધીયા, નટવરલાલ એસ.શાહ, હીરાભાઇ બાટાવાળા સહિત સદ્દગૃહસ્થોનો સહકાર અને સૌજન્ય પ્રાપ્ત થયું હતું.

ખંભાતમાં પ૦ વર્ષોથી જરુરતમંદો માટે આશિર્વાદ સમાન બનેલ અન્નપૂર્ણા ભોજનાલયની કામગીરીની સુવાસ દેશ ઉપરાંત વિદેશોમાં પણ ફેલાઇ રહી છે. સંસ્થામાં આજીવન તિથિ માટે રૂ.૩૦થી ૪પ હજાર અને દૈનિક તિથિ યોજનામાં રૂ.૩ હજારથી ૪પ૦૦ જમા કરાવવાના રહે છે. ભોજનાલયને ખંભાત શહેર, જિલ્લા અને વિદેશમાં વસતા સદ્દગૃહસ્થો તરફથી સહકાર મળતો રહ્યો છે. જેમાં વર્ષ દરમ્યાન ૧૦૦થી વધુ દૈનિક,આજીવન તિથિ પણ નોંધાયેલી હોવાનું જાણવા મળે છે.

અન્નપૂર્ણા સસ્તું ભોજનાલયની માનવ સેવાની પ્રવૃતિ કાયમી ચાલતી રહે તે માટે વર્ષ ર૦૦૧માં અન્નપૂર્ણા ટ્રસ્ટની સ્થાપના કરવામાં આવી હોવાનું ભોજનાલયના સંચાલક ગોપાલભાઇ ભટ્ટે જણાવ્યું હતું. દરરોજ રરપથી ર૭પ જરુરતમંદોને સંસ્થા દ્વારા બપોરે ટિફિનરુપે ભોજન સેવા પૂરી પાડવામાં આવે છે. વધુમાં જણાવ્યું હતું કે, અગાઉ બંને સમય ભોજન સેવા આપવામાં આવતી હતી. પરંતુ સાંજે ખીચડી-કઢી કે અન્ય ખોરાક વધવાના કારણે તેનો બગાડ થતો હતો. આથી માત્ર એક જ ટાઇમ દરરોજ બપોરે માત્ર રૂ. ર ટોકનપેટે લઇને ભરપેટ ભોજન આપવામાં આવે છે. વધુમાં જણાવ્યું હતું કે, દરરોજ ગરમાગરમ દાળ,ભાત, શાક, રોટલી પીરસવામાં આવે છે. જયારે પ્રસંગોપાત કંસાર, શીરો, લાડુ, દૂધપાક, મીઠાઇ પણ પીરસવામાં આવે છે. ભોજનાલયમાં તમામ પ્રકારની દેખરેખ મુખ્ય મેનેજીંગ ડિરેકટર મિલિન્દભાઇ શાસ્ત્રીની રાહબરી હેઠળ કરવામાં આવી રહી છે.