આ સામાન્ય સભામાં અપક્ષ વોર્ડ નંબર ૬ના કાઉન્સિલર માજીદખાન પઠાણે નડિયાદ શહેરમાં રસ્તા પર ઠેકઠેકાણે પડેલા ખાડાઓ મામલે પોતાનો આ સભામાં વિરોધ નોંધાવ્યો હતો. અપક્ષ કાઉન્સિલરે રોડાઓનુ બાચકુ લાવી નગરપાલિકામા પગથિયાં પર ઠાલવ્યું હતુ. આ ઉપરાંત નગરપાલિકાના મુખ્યગેટ પાસેના આવનજાવનના રસ્તા પર મસમોટા ખાડા પડી ગયા હોવાથી આ કાઉન્સિલરે પોતાના ખર્ચે ટ્રેક્ટર ભરી રોડા નાખીને રોડને સમતલ કર્યો છે જેથી ચાલીને જતા કે વાહન લઇને આવતા જતા અરજદારોને કોઈ તકલીફ ન પડે.અપક્ષ કાઉન્સિલર માજીદખાન પઠાણે જણાવ્યું કે, સત્તાધારી પક્ષ ગણતરીની મિનિટમાં આ સામાન્ય સભા બરખાસ્ત કરી દીધી છે. અમને સાંભળ્યા પણ નહોતા અમારો આક્ષેપ છે કે છેલ્લા એક વર્ષમાં ૭૮ કરોડ વાપરવામાં આવ્યા છે. પણ આ નાણાં ક્યાં વપરાયા છે તેની કોઈ સભામાં ચર્ચા થઇ નથી, આજે નડિયાદ શહેરમાં ઠેકઠેકાણે રસ્તાઓ તૂટી ગયેલા છે અને ખાડાઓનુ સામ્રાજ્ય છે. વોર્ડ નંબર ૪,૫,૬ની અંદર તો રોડ જ કેટલા સમયથી બન્યા નથી તો આટલી મોટી માતબર રકમ ક્યાં વપરાય તે મોટો પ્રશ્ન છે ? પ્રજાની સગવડ માટે વપરાયેલા પૈસા ખુદ નગરપાલિકા પણ વાપરી શકતી નથી તેનો દાખલો મેં પુરવાર કર્યો છે મેં મારા સ્વખર્ચે નગરપાલિકાના ગેટ પાસે પડેલા ખાડાને પુરાવ્યા છે. અને આ મુદ્દે સત્તાધારી પક્ષને આંખો ખુલે તે માટે રોડાનુ બાચકુ લાવી નગરપાલિકાના પગથિયાંમા ઠાલવી રોષ વ્યક્ત કર્યો છે.