આણંદ વેન્ડર્સ કમિટીના ચૂંટાયેલા ૬ પૈકીના એક સભ્યએ જણાવ્યું હતું કે, કલેકટર દ્વારા તાજેતરમાં ટૂંકી ગલીના દબાણો હટાવીને શહેરીજનોને અવરજવર માટે માર્ગ ખુલ્લો કરાયોની આવકારદાયક બાબત છે. ત્યારે ફેરિયાઓને નિયમોનુસાર ભાડા વસૂલીને શહેરના વિવિધ વિસ્તારોમાં પાલિકાના પ્લોટ સહિત રોડ માર્જીનની જગ્યા ફાળવવાનું આયોજન કરાય તે જરુરી છે. જેમાં પાયોનિયર ચોકડી, નવા-જૂના બસ સ્ટેન્ડ, ગણેશ ચોકડી, બોરસદ ચોકડી, વિદ્યાનગર રોડ, સામરખા ચોકડીથી જકાત નાકા, પોલસન ડેરી રોડ પરના પાલિકાના ખુલ્લા પ્લોટનો સમાવેશ થઇ શકે છે. અહીં નિયમોનુસારના ભાડેથી જ જગ્યા ફાળવાય તો વ્હાલા-દવલાની નીતિ દૂર થવા સાથે હપ્તા વસૂલીનું દૂષણ પણ અટકી શકે છે. વધુમાં જણાવ્યું હતું કે, વિદ્યાનગર રોડ પર મોતીકાકાની ચાલી બસ સ્ટેન્ડની જગ્યાએ પાલિકાનો કોમ્પલેક્ષ બનાવવાનો પ્રોજેકટ સફળ ન રહ્યો તો રાતોરાત છ-છ માસની ભાડા પાવતી આપીને ખાણીપીણીનું બજાર ઉભું કરી દીધું. જેનાથી અનેકોને જગ્યા મળવા સાથે રોજગારી મળી રહી છે. ત્યારે આ જ પ્રકારનો અભિગમ અન્ય સ્થળોએ પણ પાલિકા અપનાવે તે ઇચ્છનીય છે. જેનાથી નાના વ્યવસાયિકોને રોજગારી સાથે ગ્રાહકોને પણ નજીકના સ્થળે ખાણીપીણી સહિત જરુરી ચીજવસ્તુઓ ખરીદવાનું આસાન બની રહે.

નાના વ્યવસાયિકોને ધંધા-રોજગાર માટે સરકાર દ્વારા રૂ.૧૦,ર૦ અને પ૦ હજારની નિયમોનુસાર લોન ફાળવવામાં આવે છે. વેન્ડર્સ આર્થિક ઉત્થાન લોન સહાય અંતર્ગત લ-યાંક સિદ્ઘ કરવા માટે પાલિકામાં ખાસ વિભાગ પણ સરકારે કાર્યરત કર્યો છે. જેની બેઠક યોજાવવા સહિત વેન્ડર્સની મંજૂર થયેલ અરજી મુજબ લોન આપવા બેકોને પણ સૂચના આપવામાં આવતી હોય છે. સાથોસાથ નાના વેન્ડર્સને પણ લોન અંગેનું માર્ગદર્શન આપવા તંત્ર દ્વારા કવાયત કરાતી હોય છે. પરંતુ લોન મેળવનાર વેન્ડર્સને નિયમોનુસારની જગ્યા ફાળવણી મામલે તંત્રની હોતા હૈ, ચલતા હૈની નીતિ જ જોવા મળે છે. જો કે કેટલાક ખાસ લોકોને તેમની મનગમતી જગ્યાઓએ વ્યવસાય કરવાની છૂટ સત્તાધીશો દ્વારા છૂટ અપાતી હોવાની બાબત પણ સમયાંતરે ચર્ચાનો મુદ્દો બને છે.