કપડવંજ : રેલીયા ચેકપોસ્ટ પરથી વિદેશી દારૂની ૮૨૨૦ બોટલો ભરેલી આઈસર ટ્રક ઝડપાઈ
-ચાલક અંધારાનો લાભ લઈને ખેતરાળ રસ્તેથી ફરાર -૨૦.૨૮ લાખનો વિદેશી દારૂનો જથ્થો જપ્ત કરાયો
કપડવંજ રૂરલ પોલીસે આજે મળસ્કે રેલીયા ચેકપોસ્ટ ઉપર વાહન ચેકીંગ ઝુંબેશ દરમ્યાન એક બંધ બોડીની આઇશર ટ્રકને રોકીને તેમાંથી ૨૦.૨૮ લાખની કિંમતનો વિદેશી દારૂનો જથ્થો ઝડપી પાડ્યો હતો. જો કે ચાલક અંધારાનો લાભ લઈને ખેતરાળ રસ્તેથી ફરાર થઈ ગયો હતો. પોલીસે કુલ ૨૯.૨૮ લાખનો મુદ્દામાલ જપ્ત કરીને પ્રોહીબીશન ધારાની જુદી-જુદી કલમો હેઠળ ગુનો દાખલ કરીને કાર્યવાહી હાથ ધરી છે.
મળતી વિગતો અનુસાર ગઈકાલે રાત્રીના સુમારે પોલીસે રેલીયા ચેકપોસ્ટ ઉપર નાકાબંધી કરીને વાહનોનુ ચેકીંગ હાથ ધર્યું હતુ. દરમ્યાન વહેલી સવારના સાડા ત્રણેક વાગ્યાના સુમારે બાયડ તરફથી એક બંધ બોડીની આઇશર ટ્રક નંબર આરજે-૪૧, જીએ-૪૫૫૭ની આવી પહોંચી હતી. જેથી પોલીસે તેને બેટરીનો પ્રકાશ ફેંકીને ઉભી રાખવા માટે ઈશારો કર્યો હતો. પરંતુ ચાલકે ટ્રકને થોડે દુર લઈ જઈને ઉભી કરી દીધી હતી અને તેમાંથી ઉતરીને ખેતરાળ રસ્તેથી ફરાર થઈ ગયો હતો.
ટ્રક પાસે પહોંચેલી પોલીસે પાછળનો દરવાજો ખોલીને તપાસ કરતા અંદર વિદેશી દારૂની પેટીઓ ગોઠવેલી મળી આવી હતી. જેથી ટ્રકને કપડવંજ રૂરલ પોલીસ મથકે લાવીને તમામ પેટીઓ નીચે ઉતારીને ગણતરી કરતા વિદેશી દારૂની નાની-મોટી કુલ ૮૨૨૦ બોટલો થવા પામી હતી. જેની કિંમત ૨૦.૨૮ લાખ રૂપિયા જેટલી થવા જાય છે. પોલીસે ટ્રક સાથે કુલ ૨૯.૨૮ લાખનો મુદ્દામાલ જપ્ત કરીને ફરાર થઈ ગયેલા ટ્રકના ડ્રાયવર વિરૂધ્ધ પ્રોહીબીશન ધારાની જુદી-જુદી કલમો હેઠળ ગુનો દાખલ કરીને તેના નંબરના આધારે ઝડપી પાડવાના ચક્રો ગતિમાન કર્યા છે.