નાપા વાંટા ગામે વહેલી સવારના ચારેક વાગ્યાના સુમારે એસએમસીએ છાપો મારીને જુગાર ધામ ઝડપી પાડીને તમામ જુગારીઓને બોરસદ રૂરલ પોલીસ મથકે લઈ જઈને ફરિયાદ આપી હતી. જો કે રાત્રીના દશ વાગ્યા સુધી ફરિયાદ દાખલ કરાઈ નહોતી. સ્થાનિક પોલીસ દ્વારા પગ તળે રેલો આવતાં મોડી રાત્રે ફરિયાદ તો દાખલ કરવામાં આવી હતી પરંતુ ઓનલાઈન કરાઈ નહોતી. જેને લઈને અનેકવિદ ચર્ચાઓએ જોર પકડ્યું છે.

નાપા વાંટા ખાતે છેલ્લા કેટલાક સમયથી સ્થાનિક પોલીસની મહેરબાનીથી આ જુગારનો અડ્ડો ચાલી રહ્યો હતો. જેમાં કોને-કોને કેટલાનો હપ્તો ચુકવાતો હતો તેની એક ડાયરી પણ દરોડા દરમ્યાન એસએમસીને મળી હોવાની ચર્ચાઓ ચાલી રહી છે. ડાયરીના આધારે જો તપાસ કરવામાં આવે તો કેટલાક પોલીસ અધિકારીઓ અને કોન્સ્ટેબલો સસ્પેન્ડ થશે તેમ પણ જાણવા મળી રહ્યું છે. ઉલ્લેખનીય છે કે, સને ૨૦૦૨માં તે વખતના રેન્જ આઈજીપી કુલદીપ શર્માએ આણંદના સફીભાઈના ૧૨ નંબરના અડ્ડા પર તેમજ આદમભાઈના અડ્ડા ઉપર દરોડો પાડીને મોટાપાયે જુગારધામ ઝડપ્યું હતુ. તેમાં પણ કોને-કોને કેટલો હપ્તો ચુકવવામાં આવતો હતો, તેની ડાયરી પકડાયા બાદ તેના આધારે તમામને સસ્પેન્ડ કરી દેવામાં આવ્યા હતા.